USIJIDHARAU

#USIISHIE_NJIANI

USIJIDHARAU.

Na Steven Mshiu.

Nina kila sababu ya kumtukuza na kumuinua Mungu wa mbinguni kwa kunipa nguvu na afya tele. Mungu ametupa wiki nzuri ambayo ni ya ushindi mkubwa kwako wewe uliyedhamiria kuupata. Jambo la msingi ni kuweka juhudi kubwa juu ya kile unachokifanya ambacho kina matokeo chanya. Mara nyingi huwa napenda kusema kitu chenye matokeo chanya maana unaweza jikuta unafanya vitu ambavyo havifai na havina utukufu.

Siku moja nilikuwa katika kusanyiko Fulani. Kwa bahati nzuri tulikuwa ni vijana. Mimi nikiwa kama msemaji mkuu wa kusanyiko hilo nilim-appoint mmoja miongoni mwa vijana wale kutuongoza katika pambio la kuabudu. Kimuonekano niliamini anaweza kufanya hivyo, maana kama ni sauti anayo tena nzuri tu,

Lakini katika hali isiyokuwa ya kawaida huku vijana wote tukiwa tumesimama na kufumba macho, ukimya wa zaidi ya sekunde 45 ulitawala bila kumsikia Yule kijana niliemteua atupatie pambio ya kuabudu akianzisha wimbo. Basi nikaamua kuimba mimi mwenyewe kuliko kuendelea kupoteza muda.

Baada ya mambo yote nikamuita Yule kijana na kumhoji mambo kadhaa. Nikamuuliza kwanini hakuimba pambio? Nini kimemsibu? Je alikuwa ni mgonjwa?

Kati ya maswali yote niliyomuuliza majibu yake yalikuwa ni “HAKUNA”. Akaniambia kuwa yeye hawezi kabisa kuimba. Nikamuuliza unaweza kufanya nini sasa. Je kuomba? Looh!! Akawa mkali kabisa akasema hapo ndio hawezi kabisaaa..

Anyway. Nikawa nimejifunza mambo mengi sana. Kupitia kijana huyu. Unajua kuwa Mungu amewaumba wanadamu wote sawa. Hakuna aliyempendelea hata mmoja. Wala hakuna aliyeumbiwa kushindwa jambo lolote. Ila mwanadamu huyu kwa kushindwa kulitambua kusudi lake au kujitambua mwenyewe akaamua kujitengenezea mazingira ya kushindwa yeye peke yake.

Nilikuwa nasikiliza Audio moja ya kijana mmoja amabaye ni mwandishi na mhamasishaji kwenye group la WhatsApp akawa anafafanua kuwa akili ya mtu inapokea yale maneno anayoyazungunza na kuanza kuyafanyia kazi kwa haraka sana. Yaani kwa mfano ukisema huwezi instant akili yako inachukua lile neno siwezi na kuanza kulifanyia kazi, na huwa inaleta matokeo sahihi ambayo ni SIWEZI.

Tuko hapa tulipo kutokana na mazingira ambayo tumejijengea. Upo hapo ulipo au jinsi ulivyo kulingana na kile ulichoamua akili yako ikifanyie kazi.

Kipindi Fulani Mungu alimtaka Gideoni akapambane na Wamidian, Taifa lililowatesa Israel kwa kipindi kirefu sana. Gideoni akaanza kuwaza how comes yeye ataenda kupambana na hao wamidiani. Akairuhusu akili yake iwaone Wamidiani kuwa ni tatizo na hana namna ya kuweza kupambana nao. Akili yake ikamletea majibu mazuri tu. KUmbuka akili yako ni kama kiwanda. Akili ya Gideoni ikazalisha “bidhaa” ya woga. Ikamuelekeza akajifiche mapangoni.

Kumbuka kusudi la Mungu kwa Gideoni ni kuwa Mungu anamuona yeye kuwa ni shujaa. Mungu anaamua kumfuata Gideon kule kule mapangoni na kumtia moyo kuwa yeye ni shujaa na atawaokoa Israel dhidi ya Wamidian.

Kwa sababu akili ya Gideon ilishaathirika Mungu anaamua kufanya kazi ya ziada kumtia moyo Gideon, Mungu anamwambia aende kwa ule uwezo wake naye Mungu atajidhihirisha kwake. Lakini Gideon hakuridhika na majibu ya Mungu akawa anataka uthibitisho wa kutosha kutoka kwake, naye Mungu hakusita kufanya hivyo.

Baada ya moyo na akili ya Gideon kupona, ile sumu ya kujiona hawezi imeshaondoka, Gideon anaandaa jeshi la watu elfu 32, ili kwenda kupambana na jeshi la Wamidian lenye wanajeshi zaidi ya laki na thelathini. Kwa akili za kawaida ni ngumu kuamini, yaani mwanajeshi mmoja wa kikosi cha Gideon akapambane na wanajeshi wane wa Wamidian.

Kwa sababu Gideon ameshajivika hali ya ushujaa na kujiona Kuwa ni mshindi Mungu anamwambia hao wanajeshi ni wengi, hivyo awapunguze, Hatimaye wakapungua hadi kufikia idadi ya wanajeshi mia tatu tu (kumbuka hawa wanajeshi mia tatu wanaenda kupambana na wanajeshi laki na thelathini)

Nataka nikuonyeshe kitu kimoja hapa, Ukibaki ukiwa unajiangalia hali yako, unaangalia mazingira yako, unalinganisha na ukubwa wa tatizo lako, akili yako itakuletea kushindwa tu. Gideon akaamua kwenda na kundi lile la wanajeshi mia tatu lililogawanyika kwenye vikundi vitatu vya wanajeshi mia moja kila kikundi. Kwa hesabu ya haraka ni sawa na mwanajeshi mmoja wa Gideon anapambana na wanajeshi 440 wa Wamidian.

Nataka nikuambie kuwa huwezi kuamini Gideoni aliwapiga Wamidian kama vile panzi. Gideon wakapata ushindi mkubwa sana. Mungu akajithibitisha kwa viwango vya ajabu. Unajua ni kwanini? Gideon na jeshi lake waliweka kando ile dhana ya kushindwa na kukikiri kile Mungu alichowaambia Kwamba wao ni MASHUJAA (Ukipata muda soma Waamuzi sura ya sita nay a saba)

Watu Fulani kwenye Biblia wakaenda kuipeleleza nchi ya Kanaani wakarudi na majibu ya kukatisha tama kabisa. Wakasema kuwa nchi ile ni nzuri sana na ina kila kitu lakini watu wanaokaa katika nchi hiyo ni majitu, yaani wanawala watu wakaao katika nchi hiyo. Wakajiona wao ni kama panzi tuu. Lakini anatokea Joshua na Kalebu wanawatia watu moyo kuwa wanaweza kuimiliki nchi ile.

Nataka nikukumbushe kuwa Mungu hayuko radhi na mtu anaejidharau. Kitendo cha mwanadamu kujidhararau ni kumdharau Mungu. Tumeumbwa kwa mfano na sura ya Mungu. Pumzi yetu tumepewa na Mungu hii inamaanisha kuwa Mungu anaishi ndani yetu. Hivyo ukijidharau tu aisee jiandae kupigwa na Mungu

Mara nyingi tumekuwa tukisoma maamndiko kuwa hakuna jambo ambalo linamshinda Mungu,. Usifikiri Mungu atashuka mwenyewe aje afanye jambo. Kama akishuka yeye hakuna kiumbe chochote kitakachoweza kuhimili. Badala yake Mungu anamtumia mtu kufanya jambo. Alimtumia Gideon kuwapiga Wamidian. Alimtumia Daudi kumuua Goliath. Usifikiri zilikuwa ni nguvu za Samson peke yake kuweza kuwapiga watu laki na themanini kwa taya la punda. Hapana. Ni Mungu alikuwa anafanya kazi kupitia Samson.

NAtamani uondoke kwenye hiyo hali ya SIWEZI. Nataka ujione ukiwa shujaa kama Gideon. Unapojidharau ukajiona huwezi kumbuka kuwa hata watu wengine wanaathirika sana. Taifa la Israel lilifadhaika sana kutokana na majibu waliyoletewa na wale wazee 12 waliokwenda kuipeleleza nchi ya Kanaani

INUKA

Anza safari mpya leo. Anza kufanya kile ulichosema huwezi kukifanya. Anza kufanya kile ulichoshindwa. Niliwahi kusema kuwa kile unachoogopa kukifanya ndicho kilichobeba mafanikio yako. Kikwazo chako ndio mafanikio yako. Huna haja ya kuishia njiani, Nikthibitishie utakapoanza mwanzo mpya hakika utafikia ushindi mkubwa sana

Kama utabarikiwa na ujumbe huu ni ruksa kushea popote ili unisaidie kumkumbusha mtu mmoja kuwa asijidharau, ana nafasi ya kufikia ushindi mkubwa hivyo asiishie njiani.

Ahsante na ubarikiwe sana.

Ni mimi rafiki yako

Steven Mshiu

+255 768 882074

+255 655 882074

Smshiu42@gmail.com